特區盛事

過去幾星期，見到乜人，均話老細七月份來港。七月十一至十三嘅RISE Conference 2017，可謂全年最熱活動。上年參加企業達五千家，今年可能唔止。

RISE係六年前歐洲Web Summit嘅香港版。初創熱潮之中，近幾年RISE人氣急升，今年國際猛人雲集，高級酒店肯定去到天價。

RISE之初期冒起，因為利用大數據作宣傳及撮合，以IT科技搞高科技會議。

近年則因為邀請演講人物有份量，有部分人物非常難得一見，包括Logitech行政總裁Bracken Darrell，有人以為Logitech係台灣公司，其實總部在歐洲瑞士。

Cloudera創辦人，Hadoop權威Amr Awadallah，呢位埃及裔史丹福博士係當今最理解Hadoop技術嘅人，曾花八年時間在Yahoo建立Hadoop技術，然後創辦Cloudera，稱之為Hadoop之父，絕不為過。其他包括全球最大域名管理機構GoDaddy行政總裁Blake Irving，當然唔少得大批VC，金主之多，本港初創幾乎可一網打盡。

RISE之選址香港，當然係因為作為地區性金融中心，唔少VC已經熟悉，加上初創非常活躍，而且對於RISE非常熱情，Web Summit創辦人Paddy Cosgrave選中香港，亦係由於香港生活多姿多采，期間各式活動宴會之多，已經令參與者津津樂道，有人以為Paddy似宴會多過科技會議搞手。但RISE已成地區創業家拜聖活動，至於有乜成果，可能次要。

RISE帶來大量旅遊收益，則毫無疑問，特區政府盛事基金，認真要考慮推動一下。