iProA十年

唔經唔覺，由第一代搞網上科技人Ringo Lam創辦嘅互聯網專業協會iProA，唔經唔覺，今個月成立十周年，廿四號响Mira酒店搞晚宴，商務及經濟發展局局長劉吳惠蘭都嚟出席，恭喜哂。

踏入第二季，活動密鑼緊鼓。五月份中又有富士通周年論壇，最近佢哋啱啱重組英國同歐洲業務，聽講會從服務導向，轉型至更加產品導向，亦即係會強調番硬件嘅業務。

富士通有質素相當唔錯嘅硬件產品，筆記簿電腦唔曳之外，其他周邊設備其實都相唔少，最近佢哋用英特爾 Xeon processor 5500系列嘅PRIMERGY，响多項計算運算速度基準測試，得分破哂記錄。掃描器最近又獲專研究影像產品嘅BLI頒咗個獎。

佢哋响系統整合方面，尤其電訊業經驗豐富，可能做開電訊設備，遲啲又會推出IP-PBX。年初見到佢哋通訊系統部嘅Kevin Cheung，本港唔少電訊業整合工作，都係佢哋傑作。富士通嘅硬盤其實亦好掂，佢哋嘅外圍設備產品部阿頭Chris So話佢哋嘅硬盤都好賣得，其實唔駛佢講，阿J有親身經驗，試過在一部用咗富士通硬盤嘅電腦，寫咗個Loop程式，部機硬盤燈長亮，以為好快玩完，點知十年後，竟然運作良好！可見佢哋嘅硬件幾禁。

最近行香港矽谷「鴨記」，老友話附近基隆街，有間「德發小廚」好出名。原來條街好騎呢，成街都係回收電器電腦，周圍舖頭又裕記又紙紮舖，以為無運行，去到人山人海，菜色唔差，坐低隔離大班金毛綠毛，仲以為拍緊「龍虎門」續集，正想睇吓火雲邪神响唔响度，點知王小虎啱啱食完飯，大叫「唔該Crème brulee加Soufflé」，唔係啩，仲有法式甜品？法文講得幾正宗，失覺失覺。