手機市場洗牌

上星期有關手機嘅新聞特別多，首先諾基亞新任老頂 Elop，終於一如所料，同舊東家咪記傾成合作。兩家手機市場上苦苦掙扎嘅公司，可以負負得正，抑或累鬥累，真係唔清楚。不過股價反映，市場信心真係麻麻地。

另一單新聞就係HP就推出新手機，正式放棄Windows Phone，改而以收購Palm嘅WebOS打造嘅Veer，並且推出 Pre 3手帳同埋TouchPad平板。Veer推出後評價不俗，支援無線充電，加上Palm又具備大量Apps，連Angry Bird都有，系統多工性能強勁，舊用戶都知WebOS搜尋性能極好。

咪記嘅拍檔走一個少一個，如今好在有人漏夜趕科場。如今用緊Symbian嘅用戶，仲會唔會再升級一個就快玩用嘅平台？開發人員更加肯定雞飛狗走。如果唔儘快澄清，今年諾記智能手機嘅市場，恐怕有隱憂。

若論芸芸科技公司員工，忠誠度各有不同，最值得讚係咪記。暫時仲未見過有咪記中人，政治不正確到拎住部Mac機或者iPhone四圍走。香港咪記幾乎全人類都用緊Window Phone（iPhone可能留番放工偷偷用）。HP就啱啱相反，即使HP出咗手機 iPaq好耐，見HP員工揸住嘅就少之又少，可見產品唔好，HP員工都唔願意委屈自己。

HP收購Palm嘅主要原因，係因為WebOS。HP至今仍係咪記最佳拍檔，iPaq加上Windows Mobile，失敗誰之過？但係WebOS除咗作為手機，仲可以做平板電腦。平板電腦經過iOS同Android推動之後，Netbook市場已大受衝擊。WebOS可唔可以成第三股勢力？但對咪記嚟講，WebOS又係一隻香爐新鬼，至少响Netbook市場，大家肯定漸行漸遠。

見到賀年短訊，見知以前河床Kevin Li原來去咗Salesforce.com。近期咪記開始推Dynamics CRM，減價搶Salesforce.com同埋O記嘅客仔，Kevin遲啲可能好忙。六月份，咪記嘅新雲端方案Office 365出籠，市場上肯定更加熱鬧。