本港C&C排名打入全球十大

據報，奧巴馬政府曾經考慮採用網絡攻擊，對於敘利亞總統，結果因為產生效果難以預計而作罷。2010年，美國對付伊朗核計畫而發散Stuxnet電腦病毒，雖然Stuxnet破壞伊朗部分濃縮鈾離心機，但Stuxnet亦帶來唔少後遺症，亦牽連其他重要設施，包括各國核電廠同美國石油設施，甚至俄羅斯太空站。據俄國Kaspersky指，Stuxnet有關病毒，例如Flame同埋Gauss仍然肆虐。

病毒無眼，一旦其他犯罪份子利用，破壞其他國家設備，可能引起外交、軍事、經濟風波，甚至法律訴訟等，奧巴馬亦唔再願意動用網絡武器。網絡戰爭無聲無息，唔少攻擊同刺探行為，同國家行為有關。美國斯諾登事件後，大家先知，美國網絡間諜無孔不入，遠超想像。

網絡攻擊跨國界進行，難以追蹤。惡意程式通常由網絡外部一個C&C（command and control ）服務器控制。據美國FireEye發表報告，統計全球C&C服務器最多地區，本港排名第十位。不過，C&C在港不代表本港好多黑客，通常黑客係遙控被騎劫電腦，唔須要真正駐港，但C&C數量多，則 代表攻擊活躍，C&C通常接近攻擊目標，方便連接，本港一向係諜報中心，C&C多唔出奇。

網絡保安受監注，人事亦好似走馬燈，FireEye收購咗Mandiant後，招聘地區總經理，單記Charles Ho亦過咗檔火眼。另一家Palo Alto防火牆，就請咗Checkpoint嘅KK，取代剛離任SE頭Jones Leung。Jones就加盟雲保安方案zScaler；網絡保安行業大把空缺。

上星期，西班牙移動通信大會，消費品牌Oral B發佈咗支援藍牙4.0電動牙擦，呢款電動牙刷將擦牙情況，通過藍牙傳回手機App，指導應該加強擦邊多啲部份；擦牙紀錄再通過App通知牙醫。移動通訊亦有唔少研究用於醫療方面，蒐集生物數據；例如睡眠呼吸機、血氧濃度計（pulse oximeter）等等，聽新加坡電訊Simon Lok話，亦研究有關課題。