手機叉電學問多

今年年初，巴塞隆拿嘅Mobile World Congress，主要手機生產商同意，2012年統一嘅叉電介面，以免造成浪費，所有大廠包括諾基亞、三星、摩托羅拉都會用USB介面嘅叉電器，手機耗電量會減低，唔駛吓吓叉電。

其實充電器嘅問題，一直各施各法，除咗浪費，就只有益咗啲配件生產商。諾基亞佔市場最大，充電器最多，大陸山寨廠紛紛生產兼容諾基亞嘅叉電介面做賣點，轉換配件就多不勝數，連山寨手機都用哂諾基亞介面，叉電器都慳返。

去旅行最怕唔記得帶叉電器，帶諾基亞最穩陣，因為叉電器最易搵。偉大祖國嘅配件生產商，就出產過一種叫「萬能充」嘅叉電，好似衫夾咁，只要夾住粒電池，就乜電池都可以叉得掂，叉嘅時候仲閃吓閃吓，好生鬼。

呢個偉大發明，最平只售幾元人民幣，比起原廠叉電器平好多。但係國內唔少人指出，「萬能充」好多劣品，充電技術包括過壓保護設計，令輸出電壓穩定，好多「萬能充」電壓唔穩定，充完嘅電池好快又耗盡，叉壞電池之餘，仲分分鐘爆炸。

上星期Qualcomm嘅公關經理Adrian Fu話，年底會出一種無線嘅充電設備，利用近距離嘅磁力共振，只要符合呢種無線叉電標準嘅手機、或者任何電子設備放在充電盤一放，就自動充電，可同時叉數種電子產品。不過其實無線叉電响電動牙刷出現好耐，唔知手機生產商點解咁落後。

諾基亞亦話正研究自動蒐集能源（Energy Harvesting）嘅手機，附近有無線電波就識自己充電，不過唔知幾時推出市場。