2009年6月17日星期三

天眼變咗天無眼

旺角行人專區再擲漒水彈,搞到雞飛狗走,機電工程署安裝閉路電視「天眼」,凶徒一再犯案,仍逃之夭夭。警方賊過興兵,又話出動電腦認人,希望好似賭場捉老千,搵到可疑人物。

電腦認人,唔算新科技,「哨牙通」有份果家宏霸數碼(0802,據講就係發展呢類技術,賣俾賭場裝响門口認老千,聽講整過容都認得出嚟。阿J去過宏霸,仲見佢哋擺張賭檯響度。不過類似技術多不勝數,唔係新嘢。警方如果唔知凶徒清晰面貌,似足大海撈針。

其實智能視象監察,老早响歐美大城市採用,將影像變成IP數據,自動馬上分析,用電腦代換人眼,一眼關七,呢種技術廣泛用於反恐,唔單止可監視某種行為(例如鏡頭偵察到有人擲嘢落街、四周遊蕩、小童迷失、留低咗可疑物件,甚至有人群聚集,即刻利用高清及PTZ鏡頭,追拍事發地點),監視鏡頭亦可以點算人流車輛,類似技術又可打擊街頭販毒、捉高空擲物,响歐美好普遍。

據專家講,機電署成條街只裝八部攝錄機,如果唔係做公關,就係敷衍了事。因為根本無可能清晰覆蓋所有範圍,結果天眼其實係「天無眼」,嘥錢兼搵笨,即使凶徒再擲幾次,都係「眼光光」。

歐美嘅反恐系統,只要輸入出疑人特徵,短時間內可搜尋數以萬計小時嘅錄影片段,即使影唔到事發經過,亦可以蒐集現場證據。

呢方面最出名廠商,可能係Verint同埋NICE,幾乎全世界機場、鐵路、公共設施,都係佢哋客仔。最近思科進軍視訊,响Showcase展出IP鏡頭同埋系統,最好嘢係有兩粒DSP,可以即時在鏡頭內,分析見到嘅畫面,反應比傳統IP鏡頭更快,呢啲廠商响香港好出名,唔知機電署識唔識呢?

沒有留言:

發佈留言