處理器燒銀紙

O記買太陽，唔少人猜想，會唔會威脅到I記。因為I記嘅AIX係O記嘅重要拍乸，將來會唔會好似System i一樣，夾埋數據庫出貨。

不過，據Tech-Trans嘅Ricky講，佢認為即使O記買咗太陽，由於無做硬體經驗，佢就唔睇好。佢話做處理器好似燒銀紙，好似「哨牙通」建議咁，燒銀紙唔好手軟，十億美金咁燒。佢話HP就係燒到手軟，所以要靠英特爾，太陽最終捱唔住，亦要靠富士通，差唔多流到出大海。只有I記仍然獨撐。佢話處理器最終只剩低兩家公司。

佢以為O記因為全身瞓落Java，所以非買太陽不可，但識唔識得做硬件，就唔知嘞。聽佢咁講，O記如果醒目，最好都係快手啲沽咗啲硬嘢。

六月份太陽嘅JavaOne大會，竟然請O記阿頭Larry Ellison上台，兩家公司合併未完成，但好似已經食咗茶禮咁親密。後來Larry語出驚人，話有可能推出Solaris嘅Netbook，結果新聞又炒作一番，諗真啲真係吹水居多，Netbook市場虎穴龍潭，下年仲有高通Snapdragon上場，唔通搵棺材唔知掟？

不過，聽 O記公關Priscilla講，七月底佢哋會有重大搞頭，因為佢哋嘅中介軟件Fusion會推11g版，而且會係買咗WebLogic之後最重要嘅版本。11g聽講會追住SAP嘅NetWeaver嚟打，亦令I記嘅Websphere多咗頸敵。

Tech-Trans响本地零售界好出名，亦係O記嘅Premium Partner，到時O記買埋太陽，唔知會唔撬到I記嘅客。