Windows 567

江湖傳聞咪記孖屐亭Adam Anger安格爾調職，上星期終於宣佈，唔經唔覺，佢從Redmond已經嚟咗香港七年，可以攞三粒星。呢位先生以前學音樂，响美國曾經負責做過Windows Mobile，可以話係各IT孖屐亭中最靚仔有型。

佢嘅位由Joelle Woo接任。Joelle做過Server，而家專跟ISV打交道，首項重任當然做七仔推廣宣傳。Joelle唔經唔覺，亦做咗咪記差不多十年。

講起七仔，顧名思義即係Windows第七版。但係Windows命名一向無乜標準，較為出名當然係3.0版本同埋NT3.5，跟住就改用年份，4.0版本包括Windows 95同埋98 以及NT 4.0同埋Me，之後嘅Windows 2000、XP、2003屬於5.0版本，上一個版本Vista同2008都係屬於6.0。

不過，咪記並唔係每年都出新版本，用年份唔係好妥當，結果就還原以版本嚟命名。但究竟乜嘢情況下，Windows會係版本升級就真係唔明，理論上七仔同埋Vista分別唔係大，可以叫6.x，點解突然跳「級」就唔知嘞。

七仔嘅RC版正式向媒體公布，速度的確快好多，唔少評語亦相當正面，Herman話可以鬆一口氣，大家應該好快會見到測試結果。

一般嚟講，新版本Windows出籠，通常都趕聖誕假期前夕，配合廠家推銷。不過，好多用家唔慣Vista，目前買大廠嘅機用Vista business，响七月底前依然可以「跌」番落XP。不過亦有講法，話下一年HP機會有XP版本供應，屆時可能出現三種Windows版本同時有得賣。如果係咁計，01年上市嘅Windows XP响市場上超過九年，可以話係史上最長夀嘅Windows，最短命可能係Vista咯。