系統保安請人難

上期講過，系統保安炒得火熱，美國Fireeye剛進駐香港，以前Bluecoat嘅Mathew轉去做SE，同渠講起近期防火牆公司市盈率偏高，FortiNet市盈率超過60倍，渠話其實反映業績增長。部分較老牌子防火牆，好似Checkpoint，舊年生意亦唔差，可能追落後，擁有新一代保安技術嘅公司，更仍有值搏率。

思科講明，會响大舉收購系統保安公司，以免股價畀人睇低，但豬扒收購數名員工嘅WebScreen，就用咗一千萬大洋，未上市嘅保安公司估值超貴，好似Palo Alto上咗市亦升唔少（今年三月PAN大部分員工禁售期完結，到時唔跌，一定炒上），市場上吾少人四圍淘寶，稍為出名嘅價錢三級跳。新一代防火牆更替率加快，已蠶蝕IPS同傳統防火牆市場，思科唔再作出有力收購，系統保安部門有排驚。

不過，實際上全行缺乏人手，唔少金融機構，即使幾財雄勢大，仍難以自己請人搞保安；從HKT、Singtel、Verizon、IBM、NTT(Integralis）以至中信CPCNet，猛推管理保安服務（MSS），幾乎都請想人，具CISSP資格嘅從業員吃香。好多人話保安好似開藥房，無錢都要食藥，系統可以唔上住，保安一旦落後，聲譽不保隨時死得，唔受經濟周期影響。

唔少機構最缺乏就係人手，結果保安最易出事，大部分機構只係「自我感覺良好」，花咗大錢安裝保安，依然不斷被入侵，洩露敏感資料。系統保安上嘅第一課，應係世上無絕對安全呢樣嘢，爆完鑊都唯有繼續使錢。