網上軍備競賽

上星期《紐約時報》報導有關中美網上軍備競賽，61398部隊（或者叫解放軍總參三部二局），睇呢中國黑客果然好有規模，亦令APT（高級持續滲透攻擊）愈炒愈熱。不過美國亦經常發動APT攻擊，舊年嘅Gauss和Flame，傳聞美國國防部有份參與，呢啲APT又成為其他黑客摸仿對象；結果更難對付，終於魔高一丈，一發不可收拾，賊喊捉賊。

傳聞中，香港唔少機構，亦不知不覺中招。即使發現APT，究竟有乜資料失竊，後期亦要大量鑑證工作，除非黑客故意公開資料，否則好難揭發。黑客攻擊對象，除金融機構，亦包括各大傳媒，本港某家友報，聽講常被入侵，已成網絡保安公司大客仔，報導亦特別落力。

負責撰寫今次報告嘅 Mandiant好有名氣，2004年以嚟，一直為美國國防部解剖惡意程式，國防部專家Andrew Honig及Mandiant分析人員合作寫嘅《Practical Malware Analysis》，係研究APT聖經。Mandiant資本雄厚，所以令次報告，從中國解放軍點發動攻擊，仲指名道姓，實牙實齒，證明唔係老作。不過，中國外交部及解放軍，循例否認。

APT屬於一連串攻擊行為，必須用SIEM先可發現追尋，最近幾年SIEM好吃香，除咗Splunk、IBM買咗Q1Lab、HP有ArcSight、EMC有RSA嘅enVision，而Symantec就有SIM。

上期講到，Fireeye同有關APT嘅關係，Fireeye嘅CEO叫 Dave DeWalt，係目前矽谷最有名氣嘅CEO，亦係Mandiant董事成員。Fireeye係金融圈內最炙手可熱，年中DeWalt會訪問香港，呢位明星CEO，本港有唔少祟拜者，亦係奧巴馬總統國家網絡安全嘅顧問，大家可以留意吓。