VMWare 值搏率

上星期VMWare股價急跌，連帶拖累母公司EMC。虛擬化同雲運算係大勢所趨，VMWare第四季業績唔錯，但仍睇淡前景，宣佈即時裁員九百人。不過美國就業數據理想，盈利前景向好，大市氣氛其實唔錯，升足成個星期。

VMWare從九十幾蚊水平急挫二十蚊，跌幅超過二成。報導話，VMWare嘅市佔率，受咪記同O記等對手蠶蝕。技術上，VMWare仍然係市場領導者，好難短期內被取代；其他對手水平亦有段距離。

VMWare市值約三百三十七億，即使下跌後，市盈倍數仍有47倍，比較起O記17倍或咪記15倍高出唔少，驟眼好似幾貴，VMWare勝在有大把概念在手；除咗VDI產品View有起色，SDN係明年焦點，有機會帶動盈利。

VMWare高價收咗Nicira之後，軟體定義網絡（SDN）愈炒愈熱。上星期豬扒公佈SDN策略，涵蓋範圍比Openflow仲大，舊年底豬扒亦收購咗Contrail，據講短期內推出SDN產品及SDK，豬扒明確表示SDN係長遠策略，以軟件為主打。思科就推出onePK平台簡化部署，短期內亦推出Openflow控制器。

理論上， SDN可大大簡化網絡設定，又可以一般交換機，達到高性能數據交換，再配合雲運算，快速推出服務。但唔少投資者仍然有疑問，究竟SDN係咪炒作概念，產品幾時成熟？今年有大批SDN產品出籠，可以有分曉。

另一家做Openflow控制器嘅Big Switch估計今年上市；投資者包括高盛同埋風投Redpoint，上市價預計亦絕對唔低。