奧運五環點解識飛天？

經濟周期影響通常有滯後作用，唔少人駛緊上年批嘅「筆席」，所以唔多覺。但係做下年盤數，就有啲頭痛，因為好多搞IT研討會嘅搞手下年縮沙，所以預錢做騷都唔易。

不過，年尾特別多大騷，今個星期灣仔會展有InfoComm Asia，唔少視像會議大品牌代理都參展；好似Polycom同埋Tandberg，旅遊「筆席」咳咗，視像會議產品應該好景噃。不過視聽產品方面，亦有唔少參展商；包括為北京奧運開幕禮，鑄造夢幻五環嘅北京利亞德公司，佢哋五個環，總共用咗四萬六千幾顆LED，奇就奇呢隻五環，竟然可以凌空升起，好似吊响半空，要解開呢個謎團，到時終於可以問吓佢哋。另外，李寧飛天點火炬飛天，負責投影大型中國畫卷軸嘅美國科視系統（Christie），亦係參展商之一。不過今個禮拜澳門威尼斯人又有GSMA舉辦嘅Mobile Asia，真係唔知去得邊度。

最近幾個禮拜，都熱鬧都係Netbook市場。啱啱三星出咗部好搞鬼嘅Netbook NC10，鍵盤接近93%原大，手感唔錯。最好笑係加入一向响洗衣機用嘅「納米銀」塗面，話可以保障衛生，而跟機竟然仲係XP Home，慳返Downgrade功夫，不過講到訂價，就真係幾有競爭力。

上星期咪記終於宣佈委任梁念堅，做大中華「大大佬」，張亞勤做番中國研發集團主席，呢位Simon Leung之前掌管摩記亞太區，來頭唔細。噫，點解個名咁似响鷹君朗豪坊，做孖屐亭果位靚女Vivian個大佬？打電話問Vivian，佢話「我大佬去咗北京返工囉！」