2008年11月13日星期四

Windows 7加快出籠

上星期,咪記在上星期响加州搞WinHEC(即係Windows硬件工程師會議),又再吹噓Windows 7,並且話鐵定明年年底上市。Vista搞出個大頭佛,咪記好寄望Windows 7可以扭轉用戶對Windows嘅觀感,所以連續兩個大會都講Windows 7,聽講下年初仲出埋Beta,真係快手。

Vista最大問題,係大部分响XP上嘅驅動程式,唔能夠繼續使用,而廠商又追唔上,好多用戶望穿秋水,都用唔返啲功能,唯有將夾硬Downgrade電腦。Windows 7早啲推出,至少可減少不滿,唔駛日日鬧。咪記話九成半Vista嘅驅動程式,都可以在Windows 7上運作,確保支援最多嘅硬件。

不過,Windows 7有兩項有趣新功能,首先支援多重觸控熒幕,即係好似Macbook咁可以用不同手指動作控制物件,擘大縮細圖片,亦可以支援加速器規(accelerometers),感應硬件方向位置,好似WiiiPhone咁根據動作,控制熒幕作出反應(有乜用?唔通成日將個電腦搖來搖去?)

不過,Windows 7都有一樣嘢較實際,就係改善對固態硬碟(SSD)支援,SSD慳電又讀資料快趣,好多新Netbook都轉用。好多人試完用SSD,發覺並非想像中咁好,而且價錢亦好貴。SSD碟碟分MLC (Multi-Level-Cell)同埋SLC (Single Level Cell)SLC讀寫表現穩定好多,上星期漢科代理嘅MTRON就大清貨,MTRON全部都係SLC,減幅有成七折,不過比起MLC依然唔平。

SSD通常讀快寫慢,MLC壽命又較短,所以Windows 7一遇到SSD,就自然識得減少無謂嘅寫入動作,唔駛等隻SSD咁早瓜柴。咪記又事先張揚Windows 7支援Notebook嘅幾大改動,就係Boot機快咗(因為載入驅動程式快趣咗),此外行DVD慳多一半電,唔駛大家上飛機未睇完半隻DVD就無電(原來用幾多電,真係同Windows有關)。

沒有留言:

發佈留言