潮流興瘦身

除咗啲女人興去瘦身，近年IT都覺得太肥唔係太好，客戶愈「輕薄」愈好。

肥客戶除咗支援成本高，仲有一個問題就係保安，敏感資料好似無掩雞籠，香港醫管局同埋警方就係反面教材嘞，經常用手指抄資料，警方網上Foxy外洩機密資料，檔案網上流傳任睇，從臥底探員到大耳窿資料應有盡有，以後拍「無間道」就容易好多。

近期薄客戶百花齊放，上星期HP仲响迪士尼開騷，I記亦有呢方面嘅技術，連Redhat都四圍做介紹。業界消息，話警方正研究全面採用薄客戶，以後警員可能無得「單撈」資料，只可在警局內電腦睇資料，唔俾用USB手指攞走。警方呢單生意，可能係金融海嘯期間最大救生圈，幾間大公司揼足本錢推銷。

生意唔好，公司減薪栽員，好多公司都有分舒特拉名單，系統人員夜晚隨時返公司刪除戶口。生意唔好，瘦身節流無可厚非，HP就齊齊減人工，Mark哥減兩成，其餘減半成。HP公關大姊話，減薪都好過栽員，食少啲當減肥瘦身。口痕友話，數過啲免費報紙內，快餐店Coupon加起嚟，每日原來有成千幾蚊，叫佢可以早啲起身，去攞份免費報紙幫補吓。