半邊天

講起富士通，大部分人嘅認識，除咗筆記簿電腦，就係高檔嘅Eternus存儲系統、Sparc伺服器、PrimeQuest伺服器等。不過，阿J對佢哋嘅硬盤一向情有獨鍾，因為耐用程度極高。

原來富士通嘅响電訊行頭亦好有名。新年春茗終於認識佢哋嘅通訊部總經理張金華，原來本港不少電訊公司嘅技術整合，都係由佢哋在背後發功，包括本港電話號碼嘅可攜性計畫、 SMS互通、電訊公司CTI、FMC等產品，都係由Kelvin做電訊公司「背後嘅男人」。Kelvin話今年富士通會推出新嘅IP電話總機，Kelvin話呢套系統比對手更開放同埋兼容性更高，可支援工業標準嘅電話機頭，再唔會出現豉油貴過雞嘅情況，大家可拭目以待。

講起服務，目前嘅IT供應商幾乎間間都好注重服務，去春茗又遇見HP嘅技術服務總經理Cally Chan，即係I記Annabella Yau嘅對頭人。Cally 之前做外判服務嘅地區經理，而家就坐正香港區技術服務阿頭。點解兩家大IT企業嘅技術服務阿頭都由女性打骰？諗唔明。

HP剛買起EDS，香港都有成幾百人，可謂人強馬壯，Mark哥又講明要同I記砌，Cally都响HP做咗成十八年，論資歷真係旗鼓相當。不過Cally原來都負責推動HP挑戰思科交換機嘅ProCurve，佢話ProCurve終身保用，會有好多動作。啱啱HP又推出一個收ProCurve 開放網路生態系統，參加廠商包括咪記、Avaya、McAfee、F5 同埋Riverbed。一時間諗起思科女強人都唔少，總經理招卓敏已經係，遲早真係變咗半邊天。