奧巴馬向I記老頂借橋

I記春茗，唔見公關Florence小姐，原來一開年去茶餐廳食嘢銑親，唔通要攝下太歲？今年I記多咗新面孔，就係Samson Tai做咗Chief Technologist，專門解答技術問題，不過原來已經响I記做咗成廿幾年，另外做Software嘅Jeffrey亦剛調走咗，以前做Tivoli嘅Ricky Chung頂上。軟件部門佔I記比重愈來愈大，加上舊年收購Cognos，明年見到Ricky嘅機會應該唔少。

同JoJo傾，原來美國新任總統奧巴馬，都向I記老頂Palmisano借橋。Palmisano向奧巴馬建議用一百億美金，擴展美國寬頻網絡，電腦化醫療紀錄，並且安裝「智能輸電網」，減低電力輸送時嘅損耗。奧巴馬從善如流，照單全收。美國雖然話係技術大國，但頻寬滲透率就排名全球十六。據I記香港唐老總話，全球輸電網缺乏智能，浪費咗四至七成電力，真係驚人。

唐老總話，經濟唔好，做嘢應該更加有效率，所以Palmisano提出以IT抗海嘯。其實講到IT，香港嘅工作機會亦唔少，但係外間對IT行業理解唔多。香港通訊業聯會就舉辦一次研討會，向想入行嘅人士，介紹ICT行業真實面貌。據聯會嘅經理Kathleen介紹，今次機會難逢，邀請香港嘅藍籌企業同埋大機關領導，來一次面對面交流，大家可以體會創新科技點樣改善生活，更可多認識ICT業，了解如何IT行業起步。

其實本港有唔少世界一流嘅IT案例。二月十八號第一個講座响達之路生產力大樓

舉行，請來香港警隊嘅總電訊工程師Jolly黃振球，本港嘅999緊急服務，全世界首屈一指，究竟本港警方點樣確保呢項生死攸關嘅服務，最快接通附近「行必」嘅警務人員調動資源。呢個叫第三代數碼通訊（CC3）嘅系統唔單止獲得國際獎項，亦成為國際警方參考嘅案例。Kathleen話未來仲會有關於八達通及其他嘅講座，詳情打電話（2504 2732）去聯會問下。

McAfee收購Secure Computing，靚女經理Elizabeth今日在灣仔君悅請拍乸食早餐兼講明年「路線圖」。不過今日HP又响迪士尼開騷，真係唔知去得邊。講起HP，聽講負責MFP打印機嘅Cindy小姐弄瓦之喜，恭喜哂。