3G新用途

股神畢菲特話，水漲時好多人游水，水退時先至邊個無著褲。今勻無著褲嘅包括北電同埋Satyam，但據電訊分析公司Ovum話，兩家公司都係未來體育盛事嘅贊助商，北電係二Ｏ一二年倫敦奧運會嘅第一級技術贊助商，Satyam就贊助二Ｏ一Ｏ及二Ｏ一四嘅世界杯足球賽。

北電已經向倫敦奧運籌備委員會支付四千萬美金作為贊助商，但而家搞到要破產保護，相信倫敦奧委已打定輸數，向其他廠商招手，最可能執熱煎堆，唔駛講係思科。但世界杯就麻煩得多。

講起贊助商，今次本港三月尾舉行嘅七人欖球賽，主要兩家贊助商國泰同埋瑞士信貸，今年業績都麻麻地，最大件事仲係澳紐元匯價大跌，睇呢欖球賽熱浪，睇都要迎接嚴冬。不過，最近港龍在國內宣傳欖球賽，唔通大陸客嚟買LV名表之餘，仲會嚟睇埋欖球？

講番IT，新一年電訊業有唔少動作，其中有唔少專門用於3G HSDA網絡使用嘅數據器推出市場，只要將3G卡一插，電腦可隨時上網。3G搞咗幾年，原來發覺都係做流動寬頻最好。不過，據一位電盈高層講，佢哋發覺3G其中一個好處，係對醫學儀器影響好低，所以香港醫院將來唔駛再用DECT電話，醫護人員可以直接利用3G電話通話，方便好多。而且佢哋在3G同埋WiFi之間嘅交接好成熟，據講絕無斷線咁話，所以價錢一定比對手優勝。

3G干擾低，未來飛機上話唔定可以利用3G打長途，但以航空業境況，唔知要等幾耐。