儲存虛擬化之父訪港

唔經唔覺，又到新一年。二Ｏ一一年希望人人進步。今年最大贏家，可以話係社交網絡，所以時代雜誌以 Facebook創辦人為封面。下星期每年最多人討論嘅消費電子展（CES），網頁就照足社交網絡打造。舊年CES主打3D電視，今年聽講會集中生活科技，包括點樣用IT技術去Keep Fit。咪記嘅Kinect熱賣，今年可能有相當多產品跟住推出，大家好快會見到CES舖天蓋地嘅報導。

舊年企業市場，儲存產品最熱賣，因為Ｏ九年經濟唔好，經濟復甦大家追番升級儲存。其中HDS同NetApp增好都唔錯。HDS拍住HP同太陽，而NetApp就拍住I記，不過HP買咗3Par，同HDS關係前景會點？真係考起。

下星期HDS嘅CTO來港訪問，技術總監Hu Yoshida業界好有名氣，曾經响I記嘅儲存部門做過二十五年，預測儲存技術前景非常準確。而儲存虛擬化發展方向，可以話一錘定音，奠定儲存虛擬化發展方向。

HDS嘅USP 系列响高端儲存市場打响名堂，佢亦嘅好早就預測，儲存虛擬化只能以儲存控制器為基礎，唔可能利用FC交換器，好似Brocade同埋思科之類嘅區域儲存交換器，根本唔可能提供完整虛擬化功能。

HDS嘅USP V同近期嘅VSP系列，先後好成功，全部係呢位Yoshida先生領導下嘅出產品。佢亦係美國在儲存技術最受歡迎嘅博客之一，同I記嘅Tony Pearson嘅言論，經常受引用。目前HDS嘅VSP同I記嘅SVC，可以話係呢方面處於領導地位嘅廠商。但係I記嘅SVC發展好耐，HDS後發先至，好唔簡單。舊年日立慶祝一百年紀念，日立社長中西宏明亦經常講HDS係佢哋最重要資產，不過日立好少靠收購擴張市場，中西宏明話今年可能通過收購，加入更多技術，大家拭目待。

雖然Yoshida係日裔，不過唔係好識日文，响著名科技搖藍加大柏克萊分校畢業，仲打過越戰。