中國科技企業赴美吸金

上星期，不是微博上「當當」主席李國慶與大摩女舌戰，好多人根本唔知道，原來中國有個叫「當當」購物網，美國上市估值達十幾億美金。

李國慶話「當當」市值至少有二十億美金，但畀大摩壓價。從上市後股價表現，IPO訂價的確偏低。投資銀行同主顧關係可以咁差，大家用詞之惡毒，攻訐陰私，粗口橫飛，令人眼界大開，美國財經新聞亦用嚟做頭條。

「當當」號稱中國阿瑪遜，O九年盈利竟主要來自利息，舊年略有微利。中國企業到美國掛牌，首推以視頻分享，號稱中國Youtube嘅「優酷網」，上市因為支付昂貴版權，只靠廣告支撐大局，暫時未有盈利。

上述兩家都選擇咗美國證券交易所（NYSE），無去納斯達克。NYSE積極吸納中國科技股及再生能源，甚至去咗矽谷成立辦公室。以上兩家中國科技公司，暫時缺乏可觀盈利前景，NYSE吸納中國科技企業態度積極，可見一斑。

去年底，納斯達克出動加州聖荷西市長，遠赴大陸宣傳。美國東西岸兩個證券交易所競爭，中國科技企業融資易過借火。而新加坡證券交易所急起直追，除咗收購澳洲交易所，又聘請納斯達克OMX（開發納斯達克指數及交易平台嘅公司）主席Magnus Bocker，去咗新交所掌舵做CEO，納斯達克指交易平台ASX設計師Bob Caisley亦跟隨過檔新交所。ASX號稱全球最先進交易平台，運作納指及多個股市。可惜上市係睇股價表現，唔係技術水平，如果無人肯落飛，上市公司會繼續走佬，離開新加坡市場。

講番本地IT，唔少O記嘅員工都曾經服務HP，有人謔稱O記可以叫HP同學會，最出名個名當然係Mark Hurd。剛剛離開HP Services孖屐亭嘅Teresa亦過檔做O記應用部門。據公關大姐解釋：「魚唔過塘唔肥。」。

剛收到河床 Kevin來電郵，話終於離開工作咗五年嘅河床。 Kevin服務幾年間，河床股票由幾蚊美金升到三十幾蚊，即使唔計人工，條數非常和味，加上年年爆數，幾乎可以提早退休，聽聞接任人亦係從HP舊生。