電影阿凡達票房征服全球，呢套戲除橋段別具深意，視覺特技效果令人震撼，導演金美倫當然係居功最大。聖誕之前，Adobe嘅公關公司Becky小姐曾請睇戲，礙於事忙無睱捧場。外國唔少科技雜誌，曾對阿凡達詳細介紹嘅特技，主要涉及兩家科技公司。
阿凡達用咗唔少Adobe CS嘅工具，包括Photoshop、After Effects、Premiere Pro、InDesign、Lightroom、Connect，Adobe邀請阿凡 達嘅製片John Landau，拍咗一段專訪，介紹幕後拍攝過程，並且放上Adobe TV。Adobe TV係Adobe响網上以串流技術開設嘅電視台，影片質素好流暢，當然唔少介紹自家技術嘅內容。
著名電影作者Lisa Fitzpatrick為咗介紹阿凡達，亦寫咗一本叫「The Art of Avatar」嘅書。呢套戲連3D攝影機都係自行開發，再利用After Effects工具，拍攝完即刻合成現場同虛擬製作嘅場面，導演唔駛估吓估吓，非常犀利。所以連Wired雜誌都話，阿凡達係劃時代製作。
阿凡達亦請咗為「魔戒三部曲」做後期製嘅Weta Digital。呢家特技製作公司曾獲多次提名，問鼎格林美同奧斯卡，參與唔少大電影製作，如似King Kong。「魔戒」响紐西蘭，由Weta Digital利用hp嘅叢集運算開發，阿凡達亦响同一數據中心誕生。hp嘅Linda小姐，傳咗一篇介紹Weta Digital嘅文章。Weta Digital响紐西蘭Miramar市數據中心內伺服器，多達四千幾部，共有四萬粒處理器同埋104TB記憶體，全部係hp 雙刃式 BL2x220c 刀鋒伺服系統。Weta利用hp技術所建嘅七個Cluster，都响世界五百大超級電腦榜上有名。
唔知中國要到幾時，先可以發展出好似Weta Digital咁利害嘅公司，做全球視覺效果第一大工廠。不過據服務供應商第一線嘅CEO文立話，內地亦發展數據行業，唔少城市鼓勵投資所謂「聲谷」，亦即係話提供話音呼叫中心為主嘅服務。佢話中國好多地方，已經唔多歡迎外商搞工廠，希望吸引低污染嘅行業，並且促進就業。不過，中國呼叫中心主要做國內生意，唔係好似印度咁做歐美嘅外判業務。文立話，單係電器商國美，售後服務嘅話音服務人員就有幾百，市場潛力好大。
沒有留言:
發佈留言