CDC破產保護

上星期最轟動新聞，當然係喬布斯RIP仙遊。蘋果嘅神話，會唔會隨教主及身而絕？一時頓成全球懸念。

另一宗嘅新聞，係「中華網」母公司CDC，响美國申請破產保護令，亦即係上到第十一課。中華網係首家以中國科網概念响美國上市，曾紅極一時，主席係錢果豐博士。CDC响中國經營網上遊戲，近年收購唔少商業軟件，但業務無乜改善。

近年CDC軟件企業軟件，包括O八年收購咗專做ERP嘅本地公司ISL，呢家公司仍在科學園經營，不過已經改名做CDC Software ISL。舊年收購咗做文件管理嘅Vitova。最近CDC被一家基金入稟索償，敗訴判賠六千五百四十萬美金，唯有宣佈破產保護。

CDC嘅負債達二億五千萬美金，雖然據報有三億七千幾萬資產，但套現能力低，實際上已陷入資不抵債，加上唔少在美上市嘅中資公司，近期財政頻受質疑，處境不妙。CDC陷入危機，可能標誌中國網絡神話破滅。中國網絡行業，似資本操作多於科技創新，令人憂慮。

上星期O記終於响OW宣佈推出OPC，即係公共雲服務，軟件行業雲端化，連原本嗤之以鼻嘅O記，如今都信到十足，可見轉身唔快，做商業軟件一定無運行。

OPC包括基建PaaS同軟件服務SaaS，O記已經完全改寫大部分Fusion商業應用，以公開Java標準介面重寫，理論上用戶可隨時搬至其他支援同樣雲標準嘅雲供應商平台，好似Amazon或I記嘅Smart Cloud，Larry又諷刺Salesforce.com唔用公開標準，一旦落疊就有入無出，好似「曱甴屋」（Roach Motel）咁。不過，Siebel俾Salesforce.com追住嚟打，亦係事實。Fusion支持公開雲標準，可唔可以幫Siebel一把？