IT武林大會

上星期華爾街日報首次舉辦AsiaD:All Things Digital會議，唔少IT阿頭都雲集香港，大家招呼老細好唔得閒。豬扒老頂Johnson Kevin亦嚟咗香港，唔怪得機界咁多廣告。

Google流動部門阿頭Andy Rubin亦有參加之一，順便選擇本港發佈雪糕三文治Android 4.0及新Samsung Galaxy Nexus，手機設計比蘋果簡約，不過iPhone三日內，已經賣出400萬部，相信好難追得到。但趁AsiaD發表Android新版本，又確吸引唔少目光。聽講4.0原本較早前推出，但因為教主逝世，只有押後公布，估唔到益咗香港。

另一位被訪者係有份入股TVB嘅HTC老細王雪紅，王小姐有份創立FIC，响主機板市場曾挑戰華碩，又創立 VIA，同英特爾競爭CPU市場，可謂勇氣可嘉，HTC如今更係韓國廠最大勁敵，又係Windows Phone嘅最重要盟友，有趣係上述公司全以三個英文字母命名。呢位王小姐可以話係IT最有影響力女性，而且一係唔做，一做就想做最大。

不過最有號召力仍首推Cara Swisher訪問馬雲，講阿里巴巴點樣變成大盗，但佢無正式回答點樣解決「支付寶」爭執，亦再一次話有意收購雅虎。雅虎自從老頂Carol Bartz被炒，股價從12蚊美金慢慢回升，返上去16蚊水平，不過唔係業務好傳，而係傳言咪記同馬雲都有意收購，愈炒愈上。但公司可能被收購，想請番位新CEO同馬雲講數，亦難上加難，楊致遠亦被問到口窒窒。

另外河床公佈第三季收入升咗升四成，股價彈升一成，但係離大跌以前仲有一段距離。