2011年10月5日星期三

愈大鑊愈快樂的OW

今個星期,三藩市舉行 O記嘅OW用戶大會,又係發佈新產品之時,剛宣佈推出新 Sparc T4伺服器。OW係O記大騷,每年為三藩市帶嚟經濟刺激。今年雖然無咗HP贊助,仍有Dell、EMC、Intel、Infosys、思科等撐場。

除咗美國OW,北京及拉美亦有舉辦OW。但以三藩市OW規模最大,會期長達五日,真係唔知邊個會咁有耐性。O記產品太多,成家I記咁,應該由不同部門,自己搞用戶大會。但可能Larry Ellison鍾意湊熱鬧,順便向隔離示威。以OW人數墟冚,年年超過四萬幾,已經似嘉年華會比較多。

本港十月份亦有盛事,十九至二十一日亞洲華爾街日報舉辦嘅All Things Digital,來港嘅猛人陸續出籠,除咗較早前講過Nvidia黃仁勳、Twitter創辦人Jack Dorsey、阿里巴巴馬雲 ,雅虎楊志遠同HTC王雪紅,前副總統戈爾亦現身。

戈爾响二千年總統選舉落敗後,一直推動環保,贏諾貝爾和平獎。佢亦响美國科技界好有地位,係蘋果公司董事,谷歌高級顧問,深獲教主Steve Jobs賞識,曾力勸再選總統,可惜佢不為所動。戈爾上禮拜响南非透露iPhone 5十月將推出,一時成為國際新聞。

谷歌宣佈在港購地起數據中心,而另一叫SoftLayer嘅數據中心,亦剛在新加坡建立首個海外數據中心, 東京及本港則設POP。SoftLayer管理嘅伺服器有成二萬七千部,唔少响美國有業務嘅海外公司都用佢哋美國數據中心,佢哋亞太區總經理Todd Mitchell話,SoftLayer 特點係高度自動化,只須要二至四小時,訂購嘅主機就可以投入服務,雲端虛擬化服務速度更快,而且可以結合兩種服務一齊用,非常先進。SoftLayer仲未上市,但O八年開始已經有盈利。

上星期嘅明星股首推係亞馬遜,亞馬遜嘅雲端服務EC2亦好有名氣,宣佈推出Kindle Fire後股價爆升,平價Tablet已是明日之星,售價199美元,真係平通街,而Kindle上嘅Silk亦係首個結合雲運算瀏覽器,有消息話亞馬遜亦可能向HP購入Palm嘅,解決Kindle上嘅專利權問題。

沒有留言:

發佈留言