咪記投資香港

咪記大中華區老頂Simon Leung新官上任三個月，從北京返港跟傳媒飯局。自從Tim Chan去咗打藍球，搞中國 NBA，亞勤頂咗半年，終於搵到摩托羅拉前老頂接任。張亞勤比較學術，Simon就在商言商。

Simon嗜好投資手錶，話手錶嘅回報好過股票。不過今時今日仲可以响金魚缸搵到錢嘅人，一定唔簡單。不過佢話自己無揸大笨象（摩記就當然有），不過佢係從澳門移民去加拿大，又响本港工作多年，同唔少大孖沙熟絡，話香港人對大笨象嘅感情，好似加拿大人對北電一樣。北電曾佔多倫多股市值達六成，係加拿大之光，北電後來搞到第十一章破產保護令，好多加拿大人好傷心，可說同香港人一樣身同感受。佢話同股票談戀愛，不如買返隻靚錶戴吓，至少可以攞出嚟威。

咪記搞軟件即服務（SaaS），或者叫做雲端運算，愈來愈認真。不過，咪記嘅「軟件加服務」，並唔係主要以薄客戶，而係以Windows加上Office Suite為前端。一講到雲端，就即係諗起數據中心。

目前，咪記嘅亞洲區數據中心設响新加坡。不過，聽聲氣好似會响香港投資數據中心，因為香港基建唔錯，又接近大陸。據咪記香港區老總Herman話，下一代嘅數據中心好似積木咁，隨時可以擴張。未來幾年，咪記好多搞頭，大家拭目以待。