英特爾殺手

新年過後，萬象更新。不過金融海嘯，唔少人心事重重。下星期咪記大中華區老頂Simon Leung第一次返香港，相信唔少人會問有關咪記裁員傳聞。

外圍唔好，香港好難獨善其身。部分做開政府「破席」嘅公司，好似H3C，依然有唔錯發展，投中政府同埋學校項目。H3C在大陸嘅「平安工程」，在各大城市安裝IP鏡頭，所以本港亦有唔少項目。平安工程係中國公安部在全國大城市安裝IP監視鏡頭，據講單係廣州就安裝二十萬個IP攝錄鏡頭，目前北京安裝咗二十六萬個鏡頭。香港嘅監察鏡頭主要用嚟做交通監察，數量亦唔少，但暫時未識捉賊咁叻。

中國大陸發3G牌，做手機半導體平台嘅高通就最高興。大中華區老總孟樸就話，Ｏ七年中國業務佔高通營業額兩成一，真係犀利。最近，東芝在巴塞羅拿世界流動通信大會上，萬眾矚目嘅TG01手機，就係用佢哋嘅Snapdragon平台。Snapdragon處理器速度達1GHz，好多人引頸以待，可打破WM慢吞吞嘅宿命。

講到Snapdragon，孟總就經常提到Netbook，因為唔少利用呢個平台嘅台灣廠商，都係做開英特爾Atom嘅廠商，Snapdragon可以跑Windows 7，已具備所有網絡連接能力；包括WiFi、Bluetooth同者HSDA。高通又無諸多限制，所以未來Snapdragon推出嘅Netbook，想點就點，可以百花齊放。孟總又話，最近一款新力嘅P系列VAIO筆記薄，亦加入佢哋嘅Gobi平台，利用HSDA連接上網。

講起嚟，舊年唔少智能手機都係用高通平台，包括T-Mobile推出嘅G1（Google Phone，即係Android），採用高通MSM7201a，呢款平台亦應用在HTC Touch HD上。連網上書店阿馬遜嘅Kindle電子閱讀器都係用佢哋產品，連諾基亞最近都同佢哋簽約，唔怪得佢哋開始頻頻談及Netbook…原來英特爾真正對手，可能唔係AMD…