思科實現太陽理想

太陽之下無新事。上星期，華爾街日報話，原來年初，太陽曾同HP傾過合併，結果傾唔埋欄。然後又傳出I記商議收購太陽。

太陽同埋I記產品線唔少重疊，合併後可能炒唔少人。今時今日，美國經濟風聲鶴唳，合併可能有唔少政治後果。

太陽在電訊市場，曾經叱吒一時，又擁有業界最重要技術之一Java，近年業務不濟，市值跌剩五十幾億美元，以I記坐擁一百三十億美元現金，足夠買起有餘。

有人話，思科推出刀鋒伺服器，殺入數據中心嘅運算市場，係導致I記加快考慮收購太陽原因，以加快擴充數據中心市場。何解？思科嘅所謂「統一電腦」系統，係指數據中心內，利用同一套嘅管理軟件，控制所有元件；包括儲存、數據交換、運算能力，一次過「虛擬化」全套設備，亦即係好似將刀鋒伺服放入思科嘅Nexus交換機內。虛擬化系統直接支援交換系統，就好似《九陰真經》，打通哂奇經八脈，任督互通，應用（真氣）在不同刀鋒伺服器之間，更暢順無阻，能量大增。

思科嘅交換產品佔主導地位，開發《九陰真經》有好幫助。簡單嚟講，就好似一種專門俾數據中心用嘅作業系統，能夠化零為整，統一整個數據中心管理。目前I記同埋BMC都响數據中心，有唔錯嘅管理方案，但BMC只軟不硬，HP嘅Procurve交換機，又响數據中心份額微不足道，I記就直情無交換機產品。响數據中心嘅交換器市場最有前途嘅，要數Juniper（不過市值就近八十億美金，仲貴過太陽，如果一旦傳出收購，肯定唔止此數。最近Juniper積極搶攻北電在數據中心嘅交換機市場）。

好多人唔睇好思科做刀鋒伺服器，不過既然伺服器橫掂係Intel貨色，可以方便整體管理嘅話，好多數據中心都唔介意轉買思科產品。太陽一向嘅宣傳口號，係The Network is the Computer（網絡即電腦），估唔到最後竟然靠思科實現。