石中劍

世界盃打到嚟，活動紛紛出籠，其中當然以消費產品最積極。不過接到分銷商ACW邀請，講有一家保安廠商Sophos，上星期响觀塘東瀛遊廣場地下架Baccanale搞拍乸聚會，睇墨西哥對南非揭幕戰。Sophos賣乜唔知，不過而家至少知道有呢家公司。

今年筆席多番，世界盃大家肯定無心工作，不如請睇波，介紹產品之餘講埋波經。六七月份又好靜，仔女放暑假，全家準備放假旅行，孖屐亭無噱頭，實拍烏蠅。

保安生意全球化，產品又多，搵拍乸出席活動好難。剛接到邀請，話中國無錫又舉行第二屆世界黑客武林大會，定响九月十至十二號，叫「Excalibur Conference」，中文叫「石中劍」信息安全高峰會議。Excalibur係英國亞瑟王嘅傳說，話小孤兒華特佢破解魔咒，拔出石中神劍，登基為英格蘭之王。迪士尼亦曾拍過動畫，加州樂園中仲有石雕，神劍插响石頭裡。

中國一向俾美國鬧，响網絡發動黑客戰。有人咁沙膽，到無錫搞會議，展示各種盗取資

料新技術。不過會議名「石中劍」，聽落想解咒多過落咒。

呢個會議開得成，全靠大陸信息安全好出名嘅許榕生教授。許教授係中國計算機法證技術研究會會長，今個月底就响北京會主持法證技術峰會，香港警務處嘅Frank Law都有份出席。據佢講，其實中國企業保安觀念落伍，投入資源佔全部IT筆席，不足兩巴仙。

許教授係本身係中科院高能物理所研究員，最近經常開講，提雲計算保安漏洞，「石中劍」全靠佢先搞得成。

大陸政府好緊張，有位舊年嘅講者話，話日日好多國安跟住，不過佢哋當國安係保鏢，唔識路仲順便問吓，聽講服務仲唔錯。