創意產品

講創意特色，亞洲區其實唔會輸蝕歐美。上星期到北京公幹，買張中移動儲值卡收電郵（中移動暢聽卡包數據，不過香港無得賣。不過充值上有數據，香港更加聞所未聞），通話費啱啱就嚟用完，想賣張充值卡。突然發覺，點解中移動專門店好似少咗好多。問番大陸友人，原來大陸唔興充值卡，大家都用「網上充值」。只要上「淘寶網」，輸入電話號碼，就可以增值。

咦，乜仲有少少折頭？一按完付款，手機十分鐘，短訊話成功充值，十分神奇。上網充值用幾多充幾多，真係隨需取用，方便到極。中國太大，分銷困難，網絡嘅商機，講都講唔完。不過至於背後係唔係人肉刮卡充值，就唔知嘞。充值服務好多元化，又唔似係電信商經營，範圍好大，遊戲卡到QQ都可以充。淘寶網一向用嚟買貨，而家連服務都賣埋。不過網上充值真係慳返幾多時間，創造嘅「界外效益」，真係要搵大教授嚟計吓。

返嚟香港，發覺七仔有新電子產品賣，導遊用嘅tourPlay，用嚟俾外國遊客聽本地景點介紹。玩法簡單，只要按住地圖上標示冧把，就可以聽番相關嘅語音介紹，一路行一路聽，相當盞鬼。講真其實只係MP3，不過包埋內容，盛惠二百五十元，好似本電子書咁。生產tourPlay係家新加坡公司藍樹。