商台新搞作

剛接到商台電話，下星期開記招，講商台網站有新搞作。商台網站一向有Hong Kong Toolbar下載，可以聽商台網上電台廣播。商台公關Josephine話佢哋有新功能叫做人人發聲，加入Web 2.0功能，係人都可參予廣播。

Hong Kong Toolbar下載量已經超過二百萬次，商台互動好似由Eric Yeung主持，唔知仲有冇變。網上電台唔受大氣電波地域限制，加上支援手機，隨時都可以收聽，商台擁躉多，而家去到天涯海角都可以捧場。

今個星期較重要嘅產品發佈，當然係噚日响西九龍海濱長廊香港航空青年團直昇機坪舉行嘅新Office。發佈會搞到勞師動眾，因為Office係咪記嘅皇牌產品兼現金牛。今時今日「升呢」唔容易，除非上一代產品差到好似Vista咁，要用戶無端端轉用新版，真係唔容易。

自從咪記市值俾蘋果追過，加上股價不振，手機又變咗陪跑份子，網上就流傳老頂Steve Ballmer今年內玩完。上期新聞周刊就有篇火辣文章，批評到Ballmer一文不值。美國公司可以唔賺錢，股價唔升，就大罪囉。

今個星期另一單新聞，係SAP向外介紹同金山電池嘅合作，香港董事經總理Mike Hawes主持。金融海嘯之下，投資ERP少咗必然，SAP經營環境亦唔容易。

同Infor公關Alpha食飯，先知原來由I記去SAP嘅Tim Cheung，早前有傳出佢地位不穩，就係因為SAP盈利下跌。SAP又請咗一位係從諾基亞過檔，以前電盈做過SVP嘅Hera Siu蕭潔雲，出任中國區總裁，所以傳過Tim哥失勢，但後來SAP又澄清，大家工作範圍唔同。Tim响I記做咗二十幾年，係首批八十年代末返大陸開荒嘅行政人員，以前曾經一度短暫離開，又曾任香港區總經理，係上任大中華區董事長周煒昆愛將，呢類人大陸人脈好廣，唔易搵嫁。