搵黑客笨

今個星期，Juniper又搞一年一度嘅Solutions Day，今個星期四，即係聽日上午响尖沙咀喜來登酒店舉行。未開始正式宣傳，已經四百幾人報咗名，豬扒贏咗聯交所數據中心嘅刁，相信有唔少針對金融業高性能數據中心介紹。

前兩年收購咗 Trapeze之後，渠哋一直無乜動靜，據SE顧問Eric Ng講，今年二月份又收購另一家公司，叫Mykonos Software，產品係Intrusion Deception Systems，而唔係Intrusion Detection Systems（IDS）。顧名思義，係專門搵黑客笨嘅系統陷阱，所謂虛則實之，實則虛之。不過今年主題之一係BYOD，因為智能電話、iPad同Android平板大熱，全世界IT保安好頭痕，現場唔少示範，好實戰吓。

當日亦有位嘉賓，聽講已响任科技局副局長候選名單之列，不過渠亦可能出戰立法會，到時真係要問清楚吓。

同一日，P仔同I記灣仔君怡亦有分唇，公布P仔屬下PCCW Solutions用I記咗PureSystems幫客仔做雲運算。I記香港老總Tony Tai親自坐陣，P仔請咗PCCW Solutions老總George Fok，呢位霍燿昌先生，除咗做MD，亦係P仔集團嘅CIO，亦可能係最多專業資格嘅CIO，本身讀法律出身，具備大律師專業資格，亦係特許統計師、公司秘書、會計師等。

近來I記好多產品出籠，PureSystems可以話係系統部門最重要產品之一，夾咗唔少旗艦產品在內，包括反應唔錯嘅V7000儲存。V7000唔少性能已經可取代NetApp，市場上好多人估緊，兩家公司關係幾時正式玩完。近期唔少刁被V7000搶咗，客人知道I記OEM緊NetApp作N系列，所以特別知道NetApp弱點。

值得一提係，NetApp同思科合作推出咗一套叫FlexPod， 亦係類似PureSystems嘅整合系統，集合咗NetApp DataONTAP同思科UCS。對上星期，NetApp公佈第四季業績唔錯，睇呢FlexPod美國銷量應該幾好。