物流做零售

八達通上任張耀堂退休,聘請原來萬事達卡老頂高敏德(Kevin Goldmintz)。Kevin話八達通卡流通量超過二千五百萬張,每年仍有過百萬張增長,主要係過境旅客,因為唔少响邊境出售,顯示國內旅客一過境,就馬上買卡。

彈指一數,八達通97年推出以來,已有十七年歷史,點解服務經常創新?Kevin除咗風趣幽默,又有創意,出重獎金發動不同八達通部門同事度橋,一齊住响酒店四十八小時馬拉松度橋,不同小組要諗橋,改進業務同開發新業務,向管理層推銷,最好橋果組,每人獲豐厚獎金。Kevin話團隊要向管理層介紹構思,兼且證明財務上可行性,所以組內有不同專才。呢個比賽不單建立八達通內部創意文化,亦有助不同部門溝通。

渠話唔少同事想出嘅主意,針對幫助中小企。Kevin話除咗開發新生意,改善客戶服務亦好重要。八達通可以話掌握全港人口數據最多嘅公司,但Kevin話幫除咗警方查案,唔會用資料作其他用途,用客戶資料搵錢方案,永遠不再考慮。

八達通技術總監甘志深就話,八達通同淘寶合作非常成功,唔少買家利用八達通,加上電話NFC作小額支付,不過目前仲要用個人電腦,未來可望完全用手機一次過完成整個過程。未來八達通繼續發展流通支付,亦會同其他國家合作推出多國通行八達通。不過,多幣支付卡仍會傾向用同一晶片,如果兩粒晶卡一齊,天線位置設計上可能有干擾。

淘寶網唔少用戶原本用緊PPS,俾八達通搶走唔少生意。另一方向,淘寶推郵局交收,所謂O2O營銷模式(Online To Offline),淘寶已經可在便利店交收,加埋郵局落去,亦肯定影響未來物流生意,順豐速遞作為本港網購物流一哥,已在中國大陸開便利店作交收,仲夥拍中石化油站。

原來斧底抽薪,就係自己做埋一份。本港順豐速遞亦有租用舖位交收,但一般位置麻麻,香港便利店已夠多,將來順豐會否變為另一家759?順豐店名國內叫「嘿客」,但唔係Hacker,應該同渠哋制服有關。不過會唔會變為真正「嘿客」,由Offline做上Online,就唔知喇。