總統唔用得「黑莓」

美國即將進入奧巴馬年代，同小布殊一樣，最唔捨得都係部Blackberry。奧巴馬用咗「黑莓」原來成十年，上任美國總統後就唔再可以帶。

咁又係，堂堂美國總統帶住部「黑莓」，成何體統？原來保安機構基於保安理由，所以建議總統唔好用「黑莓」（總統嘅電郵亦有法律責任）。否則「黑莓」肯定成為全世界駭客對對象，至少阿爾蓋達，就好想知道內容。

雖然話，「黑莓」講到保安水撥不進，講到美國情報國安，就依然過唔到關。美國情報部門就可能自己都有竊看「黑莓」內容，所以點都唔俾總統用。不過，話說回頭，如果奧巴馬成功保留「黑莓」，亦肯定俾RIM用嚟大做文章。到時爭抝又一大堆。

講返IT，上星期最觸目驚心，係聯想大裁員及遭基金洗倉，戴爾關閉愛爾蘭生產基生，母板大廠華碩亦首次季度見紅。台灣係PC重鎮，今次記憶體廠仲係重災區，全部台灣生產嘅DRAM佔全球四成（南韓佔另外嘅四成）。今次經濟衰退，台灣廠商向政府要求撥款紓困，似足美國啲金融業。南韓嘅Hynix亦獲大股東韓國外匯銀行打救（因為上次金融危機，債權銀行被迫購入咗大量股權，唯有繼續「科水」），記憶體市場變相國有化，大家可期待繼續有平貨可用，台灣同埋南韓，真可謂難兄難弟。

講起台灣，原香港HP舊老頂，去咗接替「閃電」離職嘅揚人捷，台灣走馬上任後嘅Felix See，亦在當地大幅「重組業務」，唔怪得以前做台灣PSG嘅歐明哲走得咁快，馬上閃去台灣聯想做老總。相對之下，香港真係比較穩定。