軟件測試古惑多

如果講官方機構發表嘅報告，講新聞價值，最能夠引起話題，大概都係消費者委員會（其次當然係審計處。）近年，消委會從超市格價到油價計算機，證明都好有創意，市面搵笨絕招，即刻現形。

近嚟電腦病毒肆虐，消委會嘅產品測試，連防毒都唔放過。聽講話消委會問各大防毒廠商借用一套防毒軟件做測試，可能不日會有公佈，廠商可能都想知消委會用乜方法試毒，當然大為緊張。市民買防毒軟件，俾完錢買個安心，同去黃大仙拜神差唔多，即使裝咗防毒，一有頭暈身，分分鐘投訴無門。上網睇吓不同防毒廠商嘅排名，更加嚇死人。市場佔有率最大嘅，竟然唔代表排名最前，究竟防毒軟件應該點楝？

問題係，消委會如果做電腦產品測試，有乜參考價值？夠唔夠專業？

各大防毒廠商好頭痛，因為結果測試出來，可能又有一番爭論，話方法唔公道。其實電腦廠商自己做測試，亦一向好搵笨，不盡不實。好似數據庫咁，美國有個交易處理性能協會（Transaction Processing Performance Council）訂立嘅一種叫tpc嘅不同測試標準（以前最常用係tpc-c），協會嘅成員都係大名鼎鼎廠商，原則上想用番啲客觀標準，量度數據庫同硬件嘅性能，以前每逢新伺服品出台，總先講下大家嘅tpc成績同埋成本，後來傳出不少廠商作弊，結果愈嚟愈少人提及。

簡單嚟講，廠商用針對測試嘅，加入古惑嘅招數，專門粉飾數據，結果tpc得分同現實差距愈來愈大，終於無哂參考價值。所以如果有朝一日，消委會連數據庫都測試埋，結果都可能比啲唔知乜會物會，客觀好多。消委會測試防毒，大家應該歡迎。