2009年5月21日星期四

噗友大會

上星期五,從台灣傳來嘅Punch Party,在咪記金鐘嘅PP3舉行,呢個本港最大「噗友」聚會,吸引成過百人,一日之內就爆棚,亦有唔少公關媒體聞風而至,反而好多噗友,望門興嘆,不得其門而入。

其中一位講者係「站長偉」,佢有呢個稱呼,唔係因為打麻雀嘅關係,而係响九五年,有份創辦咗一個著名嘅BBS,叫到HKIBBS。寬頻未普及嘅年代,大家都係用電話線,「站長偉」係第一代Linux高手,而IBBSI字,就係代表Internet,你話幾前衛?佢建立嘅BBS,吸引唔少大學生討論,文章質素好高。

講起「站長偉」,「壹仔」都訪問過,佢以前讀大學,試過「駭入」學校嘅OpenVMS,搞到當機,成間學校無「伊媚兒」用,不過佢後來無做黑客,而家幫電訊公司搞光纖。

講起噗友,唔少公關媒體都開始積極四出搵有影響力嘅噗友,佢哋專精某類興趣,消息靈通。本港嘅噗友之中,玩手機更出神入化,聽講韓國手機廠寧願請噗友去試新機,貪佢哋夠專業。聽講澳洲旅遊局亦請噗友去嘆世界,順便講吓有乜絕世好工。

但係噗友好分散,唔少噗好似私人日記咁,好情緒化。而且寫噗唔同返工,持之以恆要有好大毅力,須要好大嘅熱情同動力。希望咪記贊助多幾次噗友大會,俾多啲人出席。

沒有留言:

發佈留言