電盈揸唔過？

四月廿七日，OFTA終於取消固定流動互連嘅收費，估計電盈每年就此唔見咗四億港元收入。自從私有化唔掂派高息，唔少證券行唱衰電盈。最近讀咗蔡東豪，佢講不仿燒冷灶，果然擲地有聲。

公道講句，家居固網電話唔掂，IDD萎縮，科網爆煲，都唔關小小超事。關鍵係電盈能唔能夠轉型，唔固步自封，抱殘守缺，識順應時勢。

電盈生意廣泛；從客服中心、寬頻、公司搬遷，都係一哥。所以原復生話電盈係現金牛，確係無講錯。自從小小超無心機搞電盈，少咗意見，呢間公司就愈嚟愈好，業務推陳出新，有唔少創新，此為電盈中人語。

政府開放電訊業初期，OFTA唔俾電盈減價，佔有率節節後退，唯有專注發展服務，結果因禍得福，服務嘅收入愈來愈穩定，過程中交唔少學費。

唔少話電訊商架床疊屋，其他亦唔好得去邊。阿J見過有電訊商，送CPE設備搵一個人，駁線另外一位，然後又有人嚟安裝，另一位做測試，一條線有成六七班兄弟，仲有一位負責Delivery，即係安排上述工作，眼花瞭亂。所以始終只能賣線，好難轉做服務同系統整合。

即使從賣線嘅角度，電盈產品齊全，幅蓋面大。其他價錢可能平啲，不過如果要訂光纖之類FE同埋GE，即係亂哂大籠，原來幅蓋有限，要四周駁線，上樓再搞大輪。上星期，打電話去中國某大電訊商，點知話落單系統「當」咗，成個星期都唔接單，假期後仲唔知邊日先整返。所以唔好妄自菲薄，以為隔離花香。

唔好似為電盈好貴，精簡人手後服務外判，搬辦公室唔少用番電盈。（最近中環寫字樓大逃亡去西九同埋鰂魚涌，拉線相當忙碌）。以前，做拉線主要都係用Systemax（Avaya）、Belden、Corning或者AMP，最近電盈經常用英國牌子Brandrex，價錢低到離譜。電盈都肯用，其他牌子有壓力。

最後申報，阿J唔係電盈股東。