豬扒贏大刁

上星期聽Juniper嘅Thomas講，話剛剛贏咗大刁，美國紐約證券交易所嘅Euronext數據中心，轉用佢哋嘅路由同交換器，激到思記嘅John Chamber媽媽聲。

豬扒路由器一向在電訊商市場比率好大，但係交換器就剛起步，估唔到馬上搶到大客仔。Euronext會將NYSE現存世界上十個數據中心，整合為紐約同倫敦兩個，據講反應時間快過五十微秒（Microsecond微秒即係一百萬分之一秒，計算Ping指令嘅Millisecond毫秒係千分之一秒）。

上星期，紐約時報報導，投資銀行高盛就係利用一種以電腦高速測試市場反應嘅電子交易技術─High Frequency Trading，極短時間內落盤，測試市場走勢，然後再跟勢以快打慢賺差價。高盛利用呢種技術賺大錢，剛公布季度業績大部分係炒賣收入，仲馬上償還所有美國政府過百億美金借貸，真係賭仔都有出頭日。交易所嘅電子落盤，變成速度之爭，肯定大把人跟風，NYSE用咗豬扒，思記有排頭痕。

接近Windows 7推出，咪記積極推銷。上周去海洋公園做騷，請大使在吊車上介紹新OS。今個星期又請分析人員聽RTM版本，而廠商之中跟咪記行得最埋可能係聯想，做計聯想推出嘅機種好多，咪記內部集中用佢哋機器做測試。

7仔賣點，都係比較安全，容易管理，以及介面易用，不過以上全部都係Vista講過嘅優點。另外就係起動比較快（呢點比較獲得認同，亦係目前去腦場叫你等7仔嘅主要原因。）另外，咪記講得最多就係多點觸控，不過一定要等新機出籠，先知有幾好。

咪記亦好快會向MSDN用戶分發7仔，另外Windows Server 2008 R2亦同時推出RTM版。R2係咪記半升級版本，即係加入新嘅功能，咪記在2003亦推出過R2版。點解7仔同2008 R2會同時推出，因為部分功能要夾埋一齊。例如新功能BranchCache，就專門做廣域優化。

目前做廣域優化最出名係河床，亦加強同咪記合作，聽佢哋係技術市務總監Bill Ting話，河床已經响虛擬化方面，取得咪記嘅SVVP硬件認證。