Google Apps泄密

新興網絡社交工具Twitter出現之後，引發唔少保安問題。最新嘅Twitter保安問題，就唔關Twitter事。而係Twitter其中一位高層員工嘅Gmail戶口被入侵，被一位法國駭客成功估到密碼提示，再入侵埋Google Apps，結果幾百份機密文件，俾呢位駭客，傳送到美國科技網站Techcrunch，再在各大報章轉載。

公佈文件嘅Techcrunch網站事後俾人炮轟，話唔應該刊登駭客提供嘅資料。據講Twitter有可能控告Techcrunch，因為除咗財務文件，又涉及唔少同Twitter建立夥伴關係嘅公司。今次意外令唔少人驚覺，文件存放網上Google Apps，雖然方便。其實好唔安全。

不過，利用Gmail傳送或者以Google Apps儲存商業機密，本身就帶來唔少隱憂，唔明點解Twitter咁大家公司，竟然對機密資料咁隨便。

「伊貓」經常泄密，而員工經常帶手提電腦，又將文件存入手指，最近幾家大公司都力推Data Loss Protection方案，確保機密資料唔會被亂咁傳送或者儲存。八成嘅泄密都內部嘅問題，例如員工為方便自己工作，文件存放公眾FTP，甚至好似啲醫生咁，成日唔見手指。不過DLP最煩唔係技術，反而係點樣實施。

DLP一向幾難實施，因為IT人要向部攞要求，睇吓邊啲資料係敏感唔出得街，或者禁止亂咁存放。但係，IT部門最怕俾人投訴，推行DLP就肯定會被人噪；例如以前可以寄出或儲存嘅文件，會俾系統鎖住，通常都要俾員工一段適應期。初期可能只發出警告，慢慢一段時間，先至唔俾出街，最近「麥家琪」就搞咗幾個有關DLP嘅講座，大家不妨留意吓。