新世界專攻IDC

上星期同新世界電訊嘅靚女經理Maria Tang食飯，佢以前響新世界流動電話做開，後來從同C仔合併後，過檔固網做宣傳推廣。

新世界流動電話以前做開PCS網，後來與CSL合併之後，母公司新世界揸返二成幾新公司股權。後來C仔又與電訊數碼組合新合營公司「新世界傳動網」，即係以前嘅「兔仔網」。CSL同埋新世界合併之後，將舊品牌俾艇仔合作，用番CSL網絡做生意，所以其實係唔同公司。唔清楚來龍去脈，確係幾混淆。

以前Maria搞唔少推廣工作，新世界傳動網以前嘅流動增值服務「M記」，同英皇娛樂有唔少合作，搞吓Ringtone下載，有「Twins Mobile」同埋「星Mobile」，攞過唔少獎，識得吓「伊莎貝拉」，估唔而家「伊人」飛上枝頭，變咗對手老細嘅「貴人」，雖然仲未係「貴妃」，不過有咗「長治」，肯定都會「久安」，靚女真係唔可以得罪。

固網產品比流動電訊複雜，固網商產品多到數唔清，各有強項。P仔好似百貨公司，其他就好似專門店，各有各做。早期新世界電訊都做消費市場，但消費市場好難做，投訴多競爭大，除咗P仔網上行，就剩低「殺價超人」鍊過，和記同埋「畸保」亦似乎無心戀戰。

最近新世界電訊唔玩家居寬頻（客戶轉去P仔），轉攻企業市場同國際話音，除咗主打IPLC同埋MPLS專線服務，搞商業寬頻，又大搞數據中心，亦研究緊做雲端運算。Maria話以往數據中心主要集中大企業用嚟做災難復原，不過唔少中小企為減少人手，伺服器亦放咗响數據中心，請佢哋分擔管理，生意好好。

Maria話新世界電訊做數據中心，有兩大優勢。首先母公司係最大嘅地產發展商之一，自設物業，肯定唔會俾人趕走，客戶唔駛驚將來俾人迫遷；其次係本身又係電訊商，同世界各地電訊商有協議，四通八達。

佢哋為咗宣傳數據中心，特別設計一個網上遊戲，介紹數據中心環境及設施。限定時間內接通儲存櫃和電源，就可過關；

http://www.newworldtel.com/minigame/NWT_iDCminiGame.html