IT收購頻密

上星期電誢新聞話，咪記嘅IE有保安漏洞，可以俾黑客控制電腦，啲實Q 公司即刻大做文章。MessageLabs 嘅Daniel Wong即刻發咗個伊貓俾拍乸，話佢哋一早已經捉到呢隻針對IE，叫Exploit:W32/Agent.LBV嘅蟲蟲，話如果用佢哋嘅MessageLabs過濾電郵，大可以放一萬個心。

雖然話，咪記响三月推出IE 8.0版本，據美國TechCrunch網站公佈：從三月到七月， IE市場佔有率，竟然下跌咗超過百分之十一，各版本IE加埋，佔市場跌到五成半以下。唔同黑客網站，多次公佈測試結果，亦指Google嘅Chrome，係目前最安全嘅瀏覽器。

瀏覽器市場第二位係「火狐」，佔有率百分之二十七，亦係增長最快嘅瀏覽器，好多用戶轉台，除咗話火狐跑得夠快，亦係同安全有關。今次電視再唱一唱，IE聲譽真係好傷，真係加埋accelerator，踩盡油識飛都無用。

上星期，Google話Chrome下年仲會出埋Netbook嘅OS版本，以Android响手機上位速度之快，相信Chrome嘅瀏覽器排位仲有得升。

講返Daniel Wong，原本响慧圖賣開文件管理，差唔多都做咗十年，結果都俾Symantec挖咗角，轉賣保安產品，可見求材若渴。近期實Q公司四周圍請人，S記對手「麥家琪」，亦收購咗唔少產品，裡面做到氣咳。

雖然話，防毒保安End Point產品價錢愈鬥愈賤，S記新版本劈價幅度仲好大，但實Q公司錢多，收購亦好頻密，使錢絕不手軟。所以個個話IT難做，Netscape嘅創辦人之一Marc Andreessen，最近就掟三億美金搞風險基金，專門投資IT及互聯網，佢話市場差，就係投資最好時機，因為少人爭。

Andreessen除咗做Netscape賺大錢，亦創立過Opsware，07年以十六億美金賣俾HP，袋袋平安。只要有橋有料，真係無有怕。