網絡設備商收入呆滯

小米手機走紅，而小米由金山主席兼主要股東雷軍創辦，加上網遊概念，金山股價亦大幅向好，從舊年開始一路攀升，業績後升得仲勁，市盈率超過五十倍。上星期公佈小米同金山合作，金山軟件旗下遊戲公司Westhouse引入小米為股東。較早前金山亦傳分析保安業務，市場消息多籮籮。

金山同小米係兩家公司，小米可唔可以衝出大陸，仍然未知之數。全球智能手機市場放緩，除非有新綽頭，即使三星及蘋果，仍然難逃銷量下跌命運。金山不斷注資手機遊戲，押注手機網遊，以小米作為戰略夥伴關係，非常明顯。但金山累積升幅已相當大，再唱好谷上唔易。

手機遊戲畫面格式同用戶體驗，同硬件規格有好關係，金山優化手機網遊畀小米，合作雙方有利。小米全球智能手機市佔率升到百分之三，國內高達百分之十二，絕大部分通過網站出售，可惜以主要機種檔次唔算高，離高端市場仍有排追，聽聞Nexus 5亦對小米3有唔少壓力，花無百日紅，無綽頭好易香。

美國網絡設備生產商公佈業績一般。Brocade首季業績後，股價一度上見十美金，但收入減少。七月開始Brocade持續向上，累積已經升咗四成。思科公佈第二季亦一般，收入下跌咗百份之七，但增加派息，股價似乎無受好大影響，科技公司唔回購股份而派息，值得捧場，不過網絡設備生產商後市趨向審慎。Infoblox公佈業績後下跌達四成，公司上市後業績急跌，依乎非香港獨有。