斯諾登助P仔成海底電纜贏家

舊年底，P宣佈收購CSL之後，就不斷有新消息公佈。其中一項係聯同全球十六家電訊商，由HKT屬下PCCW Global推動，建立橫跨歐洲及非洲超級海底電纜系統。

PCCW Global 聯同中國聯通、埃及電訊、Etisalat、Omantel 及Ooredoo，興建價值超過六億美金海底電纜系統Asia Africa Europe-1
(AAE-1)，聯繫香港、亞洲、中東、非洲及歐洲，預計2016 年開通，並响香港簽署建造及系統維護簽約，顯示P仔相當巴閉。

商業上，AAE-1可被視為P仔超越競爭對手Singtel嘅全球策略部署。AAE-1連接歐非亞通訊，同時會取代多年以來，從歐洲穿越中東至東南亞海底嘅兩條海底電纜係 SEA-ME-WE(South East Asia–Middle East–Western Europe) 4及較舊嘅SEA-ME-WE 3，呢兩條海底電纜容量細又極雍塞。八年前，Singtel開始牽頭籌建新一代SEA-ME-WE 5，可惜功敗垂成。

但自從斯諾登洩露機密，顯示美國NSA長期截聽兩條SEA-ME-WE海底電纜 ，澳洲報章廣泛報導。海底電纜途經新加坡，以往採Hub and spoke設計，報導話新加坡作為中間樞紐，美國可從新加坡截聽全球一半以上人口通訊。舊年事件曝光後，SEA-ME-WE 5臨門撻Q，唔少國家電訊商轉軚。

AAE-1設計補救上述缺點，雖然仍登陸新加坡，同時以香港、法國馬賽及新加坡作為樞紐，所有地區以分支形式登陸，無單一地區無可再竊聽所有國家資料。

AAE-1搶先獲多家區內電訊商支持率先籌建，對SEA-ME-WE 5係一大打擊，至少要再傾幾年，可視為中國電訊外交史上重大勝利，P仔作為中國區內國際電訊重要夥伴。又獲一次證明。當年香港電訊全完無可能賣畀Singtel，阿爺唔須要斯諾登告知，都深白國際電訊事業，必須要搵位信得過嘅人搞，至少話事人個和尚走得，間廟仲在。