電訊商再請IT人

飛卜收購whatsapp，創投公司Sequoia Capital投資六千萬美元，獲分三十五億美元，淨利潤近三十億美金。Sequoia曾投資蘋果、甲骨文、Paypal及Google，可謂無寶不落，成績驕人。不過創投死亡率極高，Sequoia當然亦有唔少失敗個案，包括破咗產嘅eToys。

騰訊及阿里亦趕住收購，估計啟動下一輪創業潮，創投公司好唔得閒。其實Sequoia亦有傳奇創業人物，其中一位合夥人係哈佛及史丹福畢業生Alfred Lin（林君叡），呢位神奇小子曾經夥同哈佛同學Tony Hsieh（謝家華），創辦網上鞋店Zappos。2009年，Zappos出售畀Amazon，作價達12億美金。

林君叡係創業傳奇，2010年加入Sequoia Capital成為合夥人。Zappos已經係哈佛商業評論嘅著名研究個案，因為網上買鞋竟可佔美國市場四分之一，林君叡創業從未失手，次次成功出售，之前曾經同謝家華創辦過LinkExchange，以二億六千五百萬賣畀咪記，已經係最細一單刁，後來加入Tellme Netorks，亦被咪記收購，成交價八億美記。最漂亮一役，始終係Zappos，擊敗Gap及Amazon。美國創投人物不是理論家，絕對有業績可尋。

另一則消息，係I記工作二十七年嘅Annabella Yau（邱湘營）離開，加盟英國電訊東北亞地區董事總經理。Annabella曾經响I記ITS任職好耐，負責技術服務，電訊商想轉型做服務供應商，特別係雲服務，紛紛向IT埋手請人。Verizon亦請咗以前大地瓜Francis Yip做北亞區副總裁。

日本電訊NTT收購咗大地瓜同Integralis，舊年底又收購美國雲服務Virtela及RagingWire，亦針對雲服務。NTT响香港動作多多，今年亦大推雲服務。同NTT關係密切嘅法國電訊OBS亦力推雲服務。

電訊商文化同IT服務供應商好唔同，Annabella當然有唔少行業關係，但電訊商企業文化同工作方式，尤其流程好瑣碎，同其IT行業習慣唔同。電訊商互相競爭之餘，亦要面對好似I記（SoftLayer）、Amazon及咪記Azure競爭，未來一年加入雲服務戰場，仲有財雄勢大嘅VMware，包括雲端VDI，電訊商請位IT阿頭，可唔可以同有技術實力嘅IT廠商競爭，真係好大疑問，至少據行業分析報告，似乎就唔多樂觀。