聯想轉型

港股大跌，其中聯想因收購摩記急挫。個人電腦業務萎縮，聯想急謀轉型，除咗收購I記伺服業務，再收埋摩記，以便打入美國手機市場。市場對於聯想轉型唔樂觀，導致基金洗倉，不過聯想老早已經表明向流動轉型，所以收購摩記。摩記係美國第三大智能手機品牌，銷量隨蘋果及三星之後，不過實際銷量差距相當大。

Google收購摩記後， Moto X、Moto G及Droid系列唔錯，但訂價偏高。摩記曾經係美國最流行手機，機種以物料取勝，無咁易爛，比起蘋果同三星一跌即散，仍有一定賣點，聯想又擅於控制成本。摩記流動業務亦包括專業手機，最近本港分銷商IM就推聯想TC55專業手機，除咗手機亦用作數據蒐集用途，智能手機作專業資料採集，係一大趨勢。聯想收購I記亦帶來大批富商業經驗嘅高層行政，今年估計聯想高層應有變動。舊年聯想已經換咗老總。聯想可能有相當多業務調整，一旦成功業務再上層樓，唔睇得太淡。

上星期咪記終於選出Steve Ballmer接班人，印裔薩提亞•納德拉 (Satya Nadella)  接手。納德拉係技術科班出身，領導咪記雲平台，估計可以與重返咪記救亡嘅標基合作愉快。納德拉從印度MIT（Manipal Institute of Technology）畢業後移民美國加入咪記，據紐約時報估計，矽谷五成以上工程師係移民。納德拉升任咪記首席，吸引更多出色工程師去美國，有一定含意。