九號碼頭

Autodesk推出3D打印機Ember,明年開售網站發售。不過Autodesk並非轉型,而係希望更多人投入推動3D技術。聽香港老頂Wendy話已經有幾位台灣朋友向渠預訂。呢款打印機限量生產,志在鼓勵有興趣嘅廠商加入,即使連耗材都可以由第三方生產。

一般打印機都宣傳叫人唔好用代用耗材,Autodesk啱啱相反,希望多啲代用品出現,真係相當出位。而Autodesk亦响三藩市灣區建立名為九號碼頭工作室(Pier 9 Workshop),研究3D打印機,器材值幾十萬美金,九號碼頭位於三藩市港東邊Embarcadero,亦簡稱Ember,相信Ember因此得名,適合作打印首飾之類,Ember工作室打印機就成部電單車亦可打印出來。九號碼頭工作站專門畀工業設計、設計美工、聚合物料耗材研究之用,用Autodesk工業設計軟件優化產品結構,完整打印出嚟,完全毋須開模。

3D打印機起飛,包括好多環節,有人以為打印技術一定唔夠開模平。不過打印技術生產形態千變萬化,傳統工藝根本做唔出來,所以3D打印並不一定係取代大規模生產,係另類生產模式。打個比喻,量產就好似影印機,3D打印就好似鐳射打印。究竟將來係影印機多,抑或打印機多,大家諗下。

今年初上任嘅豬扒CEO嘅Shaygan Kheradpir,上星期初突然辭任,原因竟然係有關操守。董事局馬上宣佈任職豬扒十七年嘅Rami Rahim,臨危受命,接命CEO。

Kheradpir上任不足一年,豬扒業務仍處於調整期,針對SDN及雲運算轉型。豬扒一直受基金困擾要求瘦身,結束咗唔少部門。Kheradpir不斷向基金屈服,裁員分拆部門,勞民傷財,又拖慢產品轉型步伐,最近調低第四季盈利預測。

Kheradpir曾任職巴克萊銀行,又曾經在Verizon十年;董事局睇中渠同客戶關係,但操守問題正同客戶有關。陣前易帥,雖然倉卒,未嘗唔係好事。