創新競跑

上星期科學園「創新科技嘉年華」,香港資訊科技聯會同埋科技園一齊搞「創新競跑8公里2014」。資訊科技聯會新會長邱達根同科技園主席羅范椒芬,一齊主持開步禮。比賽實時量度參賽人士身體狀況,親身體驗體育最新科技,體驗創新科技為日常生活帶來嘅好處。香港人愈嚟愈注重健康,跑步結合科技元素,果然創意十足。

利用運動手環,蒐集心跳同生理數據,運動可更快達預期效果,例如減肥或改善心肺功能,又可防止過勞。但運動時心跳受好多因素影響;包括氣壓、濕度、空氣質素、情緒,唔係咁可靠。

上期講開FitBit推出新手環可度心跳。本星期Jawbone馬上公佈新智能手環,今年推出嘅Up Move售價低於五十美金,追蹤行路步數、消耗熱量、睡眠質素等。

新款Up3就更可追蹤心跳,同時包括每日早上清晨靜止心跳(Resting heart rate),儲電池可以支持七日。一般專家相信,早上心跳率最準確衡量疲勞同壓力水平,因為其餘時間心跳可能受不同因素影響。剛清醒時靜止心跳,比較平日心跳率,可知道運動量係唔係足夠,運動量更適可而止。

以往,追蹤日常心跳率變化,只有靠平時做筆記,將來用手機就自動記錄,知道身體狀況有無異樣。呢啲數據,亦可有唔同用途,除咗用嚟運動減肥,甚至可以偵察心律不正等問題,甚至預測身體健康變化。