2015年8月26日星期三

電訊商水頭充足


本港銀行多過米舖,區域電訊商亦唔少。除咗本港搞數據中心,亦有唔少業務擴充計畫。

東南亞國家語文複雜,電訊公司老頂,唔少都講多國語文,Verizon亞太區副總裁Francis Yip曉講七種語文;除咗英文流利、普通話、馬來語、廣東話以外,法文、日文、韓文;曾任Dimension Data北亞區老頂,駐過北京東京,可以話係亞洲通。

亞太區經濟唔多穩定,但澳洲政府仍大力發展IT基建,最近Francis頻頻訪澳;Verizon企業保安服務做得唔錯,Francis舊年底同FireEye達成戰略關係,响香港亦做唔少企業保安服務,幫金融機構做鑑證服務。

舊年Verizon母公司用1300億美金天價,向Vodafone購回部份無線業務股權。近期Vodafone大展拳腳,有唔少招聘活動,主力搞IoT同M2M。

舊年年底Telstra開放國內網絡畀主要由澳洲政府持有嘅NBN,獲得110億澳元收益,澳元下跌前,剛好趕得切收購Pacnet,先賺一筆。Telstra上任老頂David Thodey希望藉Pacnet衝出國際市場,其實Pacnet海底電纜收益不斷下跌,中國業務先係主打,海外業務以往非Telstra主力,但亦係勝在水頭充足,唔少澳洲員工駐港,日日用Telepresence及Webex開會,基本上係思科最忠實用戶,又頻頻搞北上活動學習。

傳聞Telstra國際董事Tim Chen再度離開,自己開設顧問公司。Tim曾任咪記大中華CEO,2006年胡錦濤訪美,側聞係渠促成總理訪問咪記總部。Tim Chen離開咪記後,曾加入NBA推廣籃球;後來曾兩度加入Telstra,Tim Chen名符其實係中國通,肯定炙手可熱,唔知會唔會第三度回巢。



沒有留言:

發佈留言