Uber的啟示

Uber被警方調查，竟然有唔少迴響。本港營業車經營有嚴格規定；警方只係按法例執法，當然正確；反而法例是否有必要檢討，更引人反思。

當年速遞行業、ISP、長途話音回撥等新興行業，管管受過法律挑戰，證明新舊之間一定有灰色地帶，新科技愈嚟愈多，爭拗愈烈；商務及經濟發展局只負責招商，基本上唔識協調。Uber事件，側證有迫切成立創新科技局，協調各部門及相關法例，追上創新科技步伐。但有啲議員一味話搞創科局無謂，然後又嘈香港好落後，相當反智。

較早前，港府取消撤銷固定流動互連安排（Any to any connectivity），直到目前以「無須拆賬」（Bill and Keep）安排，減低流動通訊費用。當時決定維持抑或放寬規管，最大考慮之一係「消費者剩餘」（Consumer Surplus）；即係消費者支付嘅意願，再減去實際支付金額，即係買方感覺所獲得嘅額外利益；例如流動電訊收費相宜，但係即使收費更高，消費者亦極可能購買，因為相對總效用，比付出價格為低。流動應用普及，出現Uber等共享應用，又再增加消費者剩餘，社會先有進步。

因此除咗Uber是否規法，亦應聚焦Uber帶來幾多消費者剩餘？未來可推動幾多創新？理論上共享經濟（Sharing economy）共用資源。據麥肯錫全球報告估計，共享經濟可釋放九千億至一點三兆美金消費者剩餘；未來共享金融，涉及法例可能更多。Uber經營涉及多個監管部門同法例，若無創科局之類作局級統籌，前景唔太樂觀；咁功能組別議員又可否推動協調？從目前觀察，亦似乎只係得把口嘈。