流動電訊

上星期，Groupon有出售Kindle Fire嘅新刁，盛惠港幣1888，唔少人都想知道，係唔係平嘢無好，Kindle Fire講話係iPad殺手，不過好多功能其實都用唔到，亦無中文手寫，Silk瀏覽器亦唔見得好快，不過網上有Root Kindleo嘅Android系統嘅方法，破解後可裝「搜狗」手寫輸入法，不過如果耐性唔多好，都係買番個國產貨好過。網上所見Kindle Fire反應一般，大家都正等待iPad 3面世。

今個星期咪記搞TechDays，人數眾多，贊助商亦唔少，但係規矩多多。首先講明唔可以送iPad同iPhone。今期介紹新嘅Windows 8，針對平板設計，已經係遲來的回應。舊年iPad賣出四千幾萬部，完全改變咗IT；包括流動電訊同雲運算生態。上星期，新加坡見到Brocade老總Michael Klayko，佢都話多謝蘋果救咗網絡備設製造商，受iPhone同iPad帶動，電訊商條水喉幾乎年年升級，佢哋已經要求超過1Tb速度嘅連線。咪記錯過咗流動運算嘅大潮流，可謂對股東唔住。

講起流動運算，亦間接帶動雲運算同數據中心嘅生意。近期將軍澳大興木土起數據中心，聽聞話TVB財經透視都正製作特輯，發現唔少雲運算商，選擇落戶新加坡起數據中心，好似Amazon同SoftLayer都唔楝香港，製作人講起訪問業內人士，渠都話香港地價同電費貴，原來都唔係唔問題。最大難處係香港叻學生全部去哂讀商科，請唔到工程人員，先係大問題！