I記搞保安 Splunk值搏率上升

國泰升級訂票系統，全面轉用最多國際航空公司採用嘅Amadeus全球分銷系統，系統頂唔順，熱線長期打唔通，網上部分資料入都到，頻頻向乘客道歉。國泰聲譽良好，解釋話今次升級規模太大，正全力恢復系統。

國泰從七十年代用嘅主機系統，升級連接Amadeus搞到一頭煙。Amadeus由北歐航空、德航及法航等開發，全球過百家航空公司係客仔，聽起來好穩陣，今年一月尾亦曾出現故障，原因係德國數據中心系統升級出錯，當日搞到人手Check in，乘客登機大亂。IT行業有時做起嚟真係有心無力。國泰嘅主要競爭對手，新加坡航空亦唔好得幾多，聽聞上Amadeus時亦係一鑊泡，訂票系統對航空公司嚟講絕對係關鍵，點解次次大混亂，真係唔清楚。據Amadeus公佈話佢哋系統設計天衣無縫，但係已經唔止一次跪低。

I記收購Q1 Labs之後，決定大搞保安，並成立新部門，由Q1 Labs舊老細Brendan Hannigan打骰，呢家公司亦係豬扒拍乸，過去幾年增長好迅速。Q1 Labs係HP收購嘅ArcSight死對頭，不過Q1 Labs比較平，亦唔需要一定用O記資料庫。I記亦收購咗唔少做商業分析及預測嘅公司，可以為Q1 Labs產品增值，加上入侵防禦ISS，產品線相當齊全。I記搞保安，加上英特爾收購「賣咖啡」，可見保安市場前景唔曳。

Q1 Labs專門搞 SIEM，呢個市場較出名產品仲有RSA（已俾EMC收購）、ArcSight（已俾HP收購），單記又有SIM。Q1 Labs俾I記收埋，幾乎所有SIEM廠家全部歸邊，只係剩低舊年好紅嘅Splunk，聽講生意一直唔差。Splunk已申請上市，集資額一億二千五百萬美金，估計市值約十億美金，Splunk上市有值搏率，因為以咁嘅價錢，遲早可能俾英特爾收歸旗下。

但I記响保安市場並唔弱，聽講最近又搞掂咗利豐。