HP合併

上星期最大新聞，相信非HP合併兩大部門莫屬。美資鍾意搞重組，不過呢次規模比較大。

一直以嚟，投資基金一直施壓，要求HP出售利潤微薄嘅個人電腦部門 PSG，又或者分拆打印影像部門IPG套現。上任Leo Apotheker未經董事會同意， TouchPad失敗後竟然話出售個人電腦，其實如果HP願意出售PSG，一早已經做咗，唔駛請Apotheker返嚟掌舵。渠犯下天條，終於要執包袱。

新任Meg Whitman建議合併IPG同埋PSG，唔駛講精簡人手。兩個部門加起嚟佔咗HP收入一半，生意額同邊際利潤同時下跌。企業運算設備ESSN亦唔好得幾多，軟件條數亦好細，HP股價近期偏軟，壓力愈嚟愈大。基本上，HP好似三家公司咁運作，各部門班底，甚至企業文化好唔同。理論上合併節省資源，尤其係支援及市務等功能，產品更具競爭力。過程中引起文化及功能等衝突，問題唔細，同合併兩家大公司無分別。但HP業績唔好，重組算係向股東交待，但係至少需時半年，到時唔知Whitman仲健唔健在。

打印始終係HP最賺錢部門，HP合併兩個部門，一般估計應係IPG收購PSG。IPG嘅人比較著數。但係IPG老頂VJ同時亦宣佈退休，新部門反而由 PSG老頂Todd Bradley接手，凡事唔係必然。當年HP收購Compaq，老頂位置就係紅色Compaq嘅Peter Yeung。據咪記中人話，近年HP市務工作大不如前，同聯想嘅合作機會仲多。

PC市場不斷受平板蠶食，其他廠商好似聯想等極之進取，蘋果電腦銷售更大幅上升。不過蘋果用家唔少只係消費用戶，咪記中人話Mac平台銷售嘅Office套裝依然好少，仍然未能進入企業市場。

近期分銷商Westcon邀請唔少分銷商會見Silver Peak，開展本地市場。呢家網絡加速公司攞到唔少新客仔，仲見到以前豬扒做孖屐亭嘅Candy Wong，已加入銀山一年多，原來全亞太區只有渠一位市務人員，銀山集中發展印度及中國市場，同河床展開競爭。

另外一家近期加緊宣傳嘅係專門做Voice Logging嘅 Nice。呢家公司推銷監控系統，同另一家同係以色列嘅Verint競爭。Verint嘅視像監察相當出名，唔少機場都係客仔。Nice就以話音紀錄系統較有名氣，係Avaya主要合作夥伴。Verint幾年前地震，唔少人過檔咗Nice。